ភ្នំពេញ៖ ថ្នាលស្រាវជ្រាវ នវានុវត្តន៍និងបច្ចេកវិទ្យាអាហារដំបូងគេក្រោមជំនួយថវិកាគាំទ្រពីសហភាពអឺរ៉ុបដើម្បីលើកកម្ពស់ការនាំចេញនិងអភិវឌ្ឍផលិតផលជលផល នឹងអាចឱ្យកម្ពុជាទាញផលប្រយោជន៍ពីវិស័យជលផលឱ្យអស់សក្តានុពល នេះបើតាមការលើកឡើងរបស់ប្រធានផ្នែកចីរភាពប្រព័ន្ធស្បៀងរបស់អង្គការ UNIDO លោក អាលី ប៊ែរដានែត។
ក្នុងសេចក្តីប្រកាសព័ត៌មាន របស់អង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO) លោក អាលី ប៊ែរដានែត បានឱ្យដឹងថា ការបង្កើតថ្នាលនេះឡើងជាដំណោះស្រាយដ៏សក្តិសមនិងមានប្រសិទិ្ធភាពបំផុតសម្រាប់ប្រទេសកម្ពុជា ដើម្បីដោះស្រាយបញ្ហាប្រឈមផ្នែកធុរកិច្ចជលផល។
លោកបានបន្តថា៖ «ក្រោយការឧបត្ថម្ភគាំទ្រថវិកាពីសហភាពអឺរ៉ុបគម្រោង CAPFish ចាត់ទុកថ្នាលថាជាយន្តការ សសរស្តម្ភដ៏រឹងម៉ាំប្រកបដោយចីរភាព ជួយបង្កលក្ខណៈ ឱ្យស្ថាប័នជំនាញរបស់រដ្ឋ ជាពិសេសគ្រឹះស្ថានអប់រំស្រាវជ្រាវ មានលទ្ធភាពគាំទ្រកិច្ចការស្រាវជ្រាវ និងអភិវឌ្ឍន៍ផលិតផល ដែលជាតម្រូវការ និងការបោះជំហានចេញឆ្ពោះទៅរកការអភិវឌ្ឍវិស័យជលផលរបស់កម្ពុជាប្រកបដោយនិរន្តរភាព»។
ជាមួយគ្នានេះផងដែរថា រដ្ឋមន្រ្តីក្រសួងកសិកម្ម រុក្ខាប្រមាញ់និងនេសាទ លោក វេង សាខុន បានឱ្យថ្លែងថា៖ « គ្រឹះស្ថានឧត្តមសិក្សានិងស្ថាប័នស្រាវជ្រាវ គឺជាដៃគូសមស្របបំផុតសម្រាប់ជួយវិស័យឯកជន ដោះស្រាយបញ្ហានានា ជាពិសេសការកែលម្អគុណភាព និងនវានុវត្តន៍ផលិតផល»។
ឯកអគ្គរដ្ឋទូតសហហភាពអឺរ៉ុបប្រចាំនៅកម្ពុជា លោកស្រី ខាម៉ិន ម៉ូរ៉េណូ ក៏បានលើកឡើងផងដែរ ថាការរីកចម្រើនក្នុងវិស័យជលផលត្រូវបានប្រឈមមុខនឹងការលំបាកជាច្រើននាពេលបច្ចុប្បន្ន និងឧបសគ្គរចនាសម្ព័ន្ធ វិស័យនេះចាំបាច់ត្រូវបន្តការធ្វើទំនើបកម្មរបស់ខ្លួននៅក្នុងសសរស្តម្ភទាំងអស់នៃគោលនយោបាយ ហើយដំណោះស្រាយដែលត្រូវការជាចំបាច់នោះ បច្ចេកវិទ្យាទំនើប ដែលរួមមាន ការអភិវឌ្ឍការកែច្នៃ ជំនួញនិងការនាំចេញឲ្យស្របតាមស្តង់ដារអន្តរជាតិ។
លោកស្រីថា ការពង្រឹងនិងអភិវឌ្ឈវិស័យជលផលត្រូវការវិធីសាស្រ្តរួមមួយតាមរយ:យន្តការពង្រឹងសមត្ថភាពស្ថាប័ន ការស្រាវជ្រានិងអភិវឌ្ឍន៍លើបច្ចេកវិទ្យាទំនើបៗ រួមនិងការស្គាល់ ពីតម្រូវការទីផ្សារនិងអតិថិជន។
ទិន្នន័យក្នុងឆ្នាំ ២០២១ បង្ហាញថា កម្ពុជាប្រមូលផលនេសាទត្រីបានជិត ៨៦០,០០០ តោន ស្មើនឹង ១,៧ ពាន់លានដុល្លារ ដែលមានន័យថាកម្ពុជាជាមធ្យមអាចរកចំណូលបានត្រឹមតែ ២ដុល្លារក្នុងមួយគីឡូក្រាមពីផលនេសាទរបស់ខ្លួន៕